Актуелности

Меѓународен ден на планината 2022 година: жените поместуваат планини

Меѓународниот ден на планината влече корени уште од 1992 година со усвојувањето на Поглавјето 13 од Агендата 21 „Управување со кревки екосистеми: одржлив планински развој“ на Конференцијата на Обединетите нации за животна средина и развој. Зголеменото внимание на важноста на планините е наведено на Генералното собрание на Обединетите нации кога 2002 година е прогласена за Меѓународна година на планините. По тој повод, Генералното собрание на Обединетите Нации одреди 11 декември секоја година од 2003 година да се прославува како „Меѓународен ден на планината“.

Темата за Меѓународниот ден на планината 2022 година нè поканува да размислиме за основната улога што жените ја имале и сè уште ја имаат во развојот на планинските заедници и во економијата. Улога која не била никогаш доволно ценета. Гледајќи кон нашите планини, им оддаваме почит на многуте жени кои продолжуваат да поместуваат планини и кои имаат извонредна сила. Овогодишната тема на Меѓународниот ден на планините е „Жените поместуваат планини“, како признание за клучната улога на жената за зачувување на традициите, знаењето и заштитата на природните ресурси како што е биолошката разновидност во сите планински екосистеми во светот.