Актуелности

Од 12 до 14 октомври во Охрид се одржа ISAF 22, Симпозиум за земјоделство, на кој присуствуваа повеќе универзитети од Балканот. На настанот земаа учество и Фондацијата CMCC од Италија, водечка институција за климатски промени, како и Dronebase, компанија специјализирана за дронови за еколошки апликации од Италија.

Симпозиумот го отвори Ректорот на Универзитетот Св. Кирил и Методиј Проф. Д-р Никола Јанкуловски, а меѓу останатите преку видео конференција настанот го поздрави проф. Рикардо Валентини, директор на одделот за CMCC и добитник на Нобеловата награда за 2007 година за активностите за дисеминација за климатски промени. Освен проф. Валентини, на настанот присуствуваше и делегација на CMCC, предводена од проф. Џовани Алоизио, директор на Super Computing Center на CMCC. На симпозиумот CMCC го претстави проектот OFIDIA2, првиот интегриран систем за превенција и откривање на шумски пожари. Проектот кој е финансиран со програмата INTERREG, веќе е имплементиран во Италија и во Грција. Dronebase, кој моментално има заеднички активности со CMCC е високо професионална компанија, со бројни лиценци и иновативни патенти (внатрешно истражување и развој) во секторот на дронови.

Целта на двете компании беше да се направи проценка за постојано присуство во Македонија, и тоа Фондација CMCC да отвори регионална канцеларија за Балканот, додека Dronebase да отвори производствен пункт. Со оглед на искуството кое е развиено во текот на кампањата за тестирање пожари во Македонија во 2012 година, Ofidia2 може да претставува решение за проблемот со шумските пожари, а ЈП Национални шуми може да биде вистински партнер за да се поднесе проект до европските фондови. На симпозиумот присуствуваше и Министерот за земјоделство, шумарство и водостопанство Љупчо Николовски, а претставник на ЈП Национални шуми беше Коста Парлапанов, раководител на сектор за шумарство.